ಕಳೆದ ಬಾರಿ ಕಲೆ ಬೆಳಗಿಸಿದ ಕ್ಯಾಮೆರಾ ಫ್ಲ್ಯಾಶ್ – ಭಾಗ 1ರಲ್ಲಿ ಕೋಂಗೋಟ್ ದಂಪತಿಗಳ ಬಗ್ಗೆ ಬರೆದಿದ್ದೆ. ಕಲೆಯನ್ನು ತಮ್ಮ ಕರ್ತೃತ್ವ ಶಕ್ತಿಯಿಂದ ಪ್ರಸಾರಣಗೊಳಿಸುವ ಹಲವಾರು ಮಂದಿಗಳು ನಮ್ಮ ನಡುವೆ ನಿಸ್ವಾರ್ಥತೆಯಿಂದ ಕೆಲಸ ಮಾಡುತ್ತಾ ಇದ್ದಾರೆ. ಅಂತಹಾ ಹಲವು ಮಹನೀಯರು ನಮ್ಮ ನಡುವೆ ಇದ್ದಾರೆ ಎಂದು ಹೇಳಿದ್ದೆ. ಅವರಲ್ಲಿ ಮಧುಸೂದನ ಅಲೆವೂರಾಯರ ಹೆಸರು ಅಗ್ರಪಂಕ್ತಿಯಲ್ಲಿದೆ. ಆದುದರಿಂದ ಕಲೆ ಬೆಳಗಿಸಿದ ಕ್ಯಾಮೆರಾ ಫ್ಲ್ಯಾಶ್ – ಭಾಗ 2 ರಲ್ಲಿ ಮಧುಸೂದನ ಅಲೆವೂರಾಯರ ಬಗ್ಗೆ ಹೇಳಲೇ ಬೇಕು.
ಅಲೆವೂರಾಯರ ಹೆಸರನ್ನು ಕೇಳದವರಾರು? ಸಾಧಾರಣವಾಗಿ ಯಕ್ಷಪ್ರೇಮಿಗಳೆಲ್ಲರೂ ಕೇಳಿಯೇ ಇರುತ್ತೀರಿ. ಅವರ ಯಕ್ಷಗಾನದ ನಂಟು ಇಂದು ನಿನ್ನೆಯದಲ್ಲ. ಹಲವಾರು ವರ್ಷಗಳಿಂದಲೂ ಛಾಯಾಗ್ರಾಹಕರಾಗಿದ್ದುಕೊಂಡು ಕಲಾವಿದರೂ ಆಗಿ ಯಕ್ಷ ಕೈಂಕರ್ಯವನ್ನು ಮುಂದುವರಿಸಿಕೊಂಡು ಬರುತ್ತಿದ್ದಾರೆ. ಮಂಗಳೂರಿನಂತಹಾ ಸಾಂಸ್ಕೃತಿಕ ಲೋಕ ಅನಾವರಣಗೊಳ್ಳುವ ನಗರವನ್ನು ತನ್ನ ಕಾರ್ಯಕ್ಷೇತ್ರವನ್ನಾಗಿ ಮಾಡಿಕೊಂಡು ತಾನು ಸ್ವತಃ ಹಿಮ್ಮೇಳ ಕಲಾವಿದನಾಗಿ ಕಲಾಪ್ರದರ್ಶನಗಳಲ್ಲಿ ಭಾಗವಹಿಸುತ್ತಿರುವುದರ ಜೊತೆಯಲ್ಲಿಯೇ ಯಕ್ಷಗಾನ ಪ್ರದರ್ಶನಗಳ ಛಾಯಾಗ್ರಹಣವನ್ನೂ, ದಾಖಲೀಕರಣದ ಕಾರ್ಯವನ್ನೂ ಒಂದು ಉತ್ತಮ ಹವ್ಯಾಸವನ್ನಾಗಿ ಮಾಡಿಕೊಂಡಿದ್ದಾರೆ.
ವೃತ್ತಿಯಲ್ಲಿ ಲೆಕ್ಕಪರಿಶೋಧಕರಾದ ಮಧುಸೂದನ ಅಲೆವೂರಾಯರ ಮಡದಿ ಜಯಲಕ್ಷ್ಮಿ ಗೃಹಿಣಿ. ಮಕ್ಕಳಾದ ಆದಿತ್ಯ ಮತ್ತು ಅಪೂರ್ವ ಇಬ್ಬರೂ ಇಂಜಿನೀರಿಂಗ್ ಓದುತ್ತಿದ್ದಾರೆ. ಇಬ್ಬರು ಮಕ್ಕಳೂ 10 ವರ್ಷಗಳ ಕಾಲ ವೇಷಧಾರಿಗಳಾಗಿ ಕಲಾಸೇವೆಗೈದಿದ್ದಾರೆ. ಈಗ ಉನ್ನತ ವ್ಯಾಸಾಂಗ ಮಾಡುತ್ತಿರುವ ಕಾರಣದಿಂದ ಯಕ್ಷಗಾನದಿಂದ ಸ್ವಲ್ಪ ಸಮಯದ ವರೆಗೆ ದೂರ ಉಳಿದಿದ್ದಾರೆ. ಅಲೆವೂರಾಯರ ತಂದೆ ಲಕ್ಷ್ಮೀನಾರಾಯಣ ಅಲೆವೂರಾಯರು ಯಕ್ಷಗಾನ ವೇಷಧಾರಿ. ಕುತೂಹಲಕಾರಿ ಸಂಗತಿಯೆಂದರೆ ಕೈ ಬರಹದ ಮತ್ತು ತಾಳೆಗರಿಯ ಅನೇಕ ಪ್ರಸಂಗಗಳು ಅವರ ಸಂಗ್ರಹದಲ್ಲಿ ಇದ್ದವು. “ಆಗ ನಮಗೆ ಅದರ ಮಹತ್ವ ತಿಳಿಯದ ಕಾರಣ ಅವರ ನಿಧನಾ ನಂತರ ಅವುಗಳೆಲ್ಲಾ ನಾಶವಾದುವು.1994ರಲ್ಲಿ ಅವರು ನಿಧನರಾದರು. ಅವರ ನೆನಪಿನಲ್ಲಿ ಪ್ರತಿ ವರ್ಷ ಒಬ್ಬರು ಕಲಾವಿದರನ್ನು ಸನ್ಮಾನಿಸುತ್ತೇವೆ ಈ ವರ್ಷ ಭಾಗವತ ಹರೀಶ್ ಶೆಟ್ಟಿ ಸೂಡರನ್ನು ಸನ್ಮಾನಿಸಿದ್ದೇವೆ.” ಎಂದು ಮಧುಸೂದನ ಅಲೆವೂರಾಯರು ಹೇಳುತ್ತಾರೆ. ಇವರು ಅಧ್ಯಕ್ಷನಾಗಿರುವ ಸರಯೂ ಬಾಲ ಯಕ್ಷ ವೃಂದವು ಸುಮಾರು 9 ವರ್ಷಗಳಿಂದ ವೃತ್ತಿ ಕಲಾವಿದರನ್ನು ಒಟ್ಟುಗೂಡಿಸಿ ಪ್ರತಿ ವರ್ಷ ಬಯಲಾಟ ಸಪ್ತಾಹವನ್ನುನಡೆಸಿಕೊಂಡು ಬರುತ್ತಿದೆ ಮತ್ತು ಅದರಲ್ಲಿ ನೂರಾರು ಕಲಾವಿದರನ್ನು ಸನ್ಮಾನಿಸಿದ್ದಾರೆ. ಯಕ್ಷಗಾನ ಭರತನಾಟ್ಯ, ಪ್ರಸಾಧನದವರು, ಸಂಘಟಕರು, ಅಂಧ ಕಲಾವಿದರು ಹೀಗೆ ಒಂದು ಸಪ್ತಾಹದಲ್ಲಿ 10 ರಿಂದ 12 ಕಲಾವಿದರನ್ನು ಸನ್ಮಾನಿಸುತ್ತಾರೆ. ಈ ಸಾಲಿನಲ್ಲಿ ಕೋರೋನಾ ಬಾಧೆಯಿಂದ ಇರುವ ನೀತಿ ನಿಯಮಾವಳಿಗಳಿಂದಾಗಿ ಸಪ್ತಾಹ ಸಾಧ್ಯವಾಗಲಿಲ್ಲ. ಆದರೂ ಅವಕಾಶ ಸಿಕ್ಕಿದಂತೆ ಕಾರ್ಯಕ್ರಮ ಸಂಯೋಜಿಸಿ ಈ ತಿಂಗಳಿನಲ್ಲಿ 5 ಜನ ಹವ್ಯಾಸಿ ಕಲಾವಿದರನ್ನು ಅಲೆವೂರಾಯರ ಸಾರಥ್ಯದ ಸರಯೂ ಯಕ್ಷ ಬಾಲವೃಂದ ಸನ್ಮಾನಿಸಿದೆ.
ಅವರ ಛಾಯಾಗ್ರಹಣದಲ್ಲಿ ಅರಳಿದ ಹಲವಾರು ಚಿತ್ರಕುಸುಮಗಳು ಇಂದು ಸಾಮಾಜಿಕ ಜಾಲತಾಣದಲ್ಲಿಯೂ ವಿವಿಧ ಪತ್ರಿಕೆಗಳು, ಕೃತಿ, ಪುಸ್ತಕಗಳಲ್ಲಿಯೂ ಬೆಳಕು ಕಂಡಿದೆ. ಅವರು ಚಿತ್ರೀಕರಿಸಿದ ಹಲವಾರು ಯಕ್ಷಗಾನ ದೃಶ್ಯಗಳು ಇಂದು ಸಾಮಾಜಿಕ ಜಾಲತಾಣಗಳಾದ ಯು ಟ್ಯೂಬ್, ಫೇಸುಬುಕ್ ಮೊದಲಾದವುಗಳಲ್ಲಿ ವಿಶಿಷ್ಟ ಸ್ಥಾನವನ್ನು ಗಳಿಸಿವೆ. ಇವರ ಯು ಟ್ಯೂಬ್ ಚಾನೆಲ್ ದೇಶ ವಿದೇಶಗಳಲ್ಲಿ ನೆಲೆಸಿದ ಲಕ್ಷಾಂತರ ಮಂದಿ ವೀಕ್ಷಕರನ್ನು ಹೊಂದಿದೆ. ಯು ಟ್ಯೂಬ್ ನಲ್ಲಿ Madhusudana Alewooraya ಎಂಬ ಹೆಸರಿನಲ್ಲಿರುವ ಈ ಚಾನೆಲ್ ಈ ವರೆಗೆ ಸುಮಾರು 27400ಕ್ಕೂ ಹೆಚ್ಚು Subscribers ನ್ನು ಹೊಂದಿದೆ. ಇದರಲ್ಲಿ ಸುಮಾರು 5459 ವೀಡಿಯೋಗಳಿವೆ. ಮಧುಸೂದನ ಅಲೆವೂರಾಯರ ವಿಶಷ್ಟತೆಯೊಂದನ್ನು ಇಲ್ಲಿ ಹೇಳಲೇ ಬೇಕು. ಅವರ ಸಂಗ್ರಹದಲ್ಲಿ ಬಹಳಷ್ಟು ಅಪರೂಪ ಸಂಗ್ರಹಗಳಿವೆ. ಕೆಲವೊಂದು ಯಕ್ಷಗಾನದ Antique ಪ್ರದರ್ಶನಗಳ ದೃಶ್ಯಾವಳಿಗಳು ಅವರ ಸಂಗ್ರಹದಲ್ಲಿ ಇವೆ. ಅದರಲ್ಲಿ ಹೆಚ್ಚಿನದನ್ನು ಅಪ್ಲೋಡ್ ಮಾಡಿದ್ದಾರೆ. ಅಪ್ಲೋಡ್ ಮಾಡದೇ ಇರುವ ಇನ್ನೂ ಕೆಲವು ಅವರ ಸಂಗ್ರಹದಲ್ಲಿ ಇರಬಹುದೆಂದು ನನ್ನ ಊಹೆ.
ಕೆಲವೊಂದು ಈಗ ದೊರಕಲು ದುರ್ಲಭವಿರುವ, ಕಷ್ಟಸಾಧ್ಯವಾದ ವೀಡಿಯೊಗಳು ಮತ್ತು ಕೆಲವೊಂದು ವೈಶಿಷ್ಟ್ಯಪೂರ್ಣವಾದ ವೀಡಿಯೊಗಳು ಅವರ ಚಾನೆಲ್ ನಲ್ಲಿವೆ. ಕಲಾವಿದ ದಂಪತಿಗಳ ವೀಡಿಯೊ, ಅಳಿದುಹೋದ ಕಲಾವಿದರ ಯಕ್ಷಗಾನದ ವೀಡಿಯೊ ಹೀಗೆ ಈ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ. ಮಧುಸೂದನ ಅಲೆವೂರಾಯರು ತಾನು ಸ್ವತಃ ಕಲಾವಿದರು. ಆಟಕೂಟಗಳಲ್ಲಿ ಪ್ರದರ್ಶನ ನೀಡುವ ಉತ್ತಮ ಮದ್ದಳೆಗಾರರು. ತಾನು ಕಲಾವಿದರಾಗಿದ್ದುದು ಮಾತ್ರವಲ್ಲ ಯಕ್ಷಗಾನ ಪ್ರಸಾರಕರಾಗಿದ್ದುಕೊಂಡೂ ಕಲಾಸೇವೆಗೈಯುವ ಮಧುಸೂದನ ಅಲೆವೂರಾಯರ ಯು ಟ್ಯೂಬ್ ವೀಡಿಯೋ ಲಿಂಕ್ ಒಂದನ್ನು ಕೆಳಗೆ ಕೊಡಲಾಗಿದೆ. ನೋಡಲೇಬೇಕಾದ ವೀಡಿಯೋ ಇದು.
ಇದೊಂದು ಅನಿರೀಕ್ಷಿತ ಲೇಖನ ನೋಡಿ ತುಂಬಾ ಸಂತೋಷವಾಯಿತು ಧನ್ಯವಾದಗಳು ವಳಕುಂಜ ಸಹೋದರರಿಗೆ ಯಕ್ಷಗಾನಕ್ಕೆ ನಿಮ್ಮ ಕೋಡುಗೆಯೆ ಎದುರಿಗೆ ನನ್ನದು ಬಿಂದು ಆದರೂ ಗುರುತಿಸಿದ್ದೀರಿ ಸಂತೋಷ ಹೀಗೆಯೇ ಅವಿರತವಾಗಿ ಸಾಗಲಿ ನಿಮ್ಮ ಯಕ್ಷಪಯಣ.