ಬದುಕನ್ನು ಭವ್ಯವಾಗಿ ಬದುಕಿಸಿ, ಬದುಕನ್ನು ಕಲಾಪೂರ್ಣವಾಗಿ ಅರಳಿಸುವ ಸುಂದರ ಶ್ರೀಮಂತ ಕಲೆ ಅಂದರೆ ಯಕ್ಷಗಾನ ಎಂದು ಖ್ಯಾತ ನಾಟಕಕರ್ತ, ಕಲಾವಿದ, ಜೇವರ್ಗಿ ನಾಟಕ ಕಂಪನಿಯ ಮಾಲಕ ಜೇವರ್ಗಿ ರಾಜಣ್ಣ ನುಡಿದರು.
ಅವರು ಶಿರಸಿಯ ಲಾಯನ್ಸ ಕ್ಲಬ್ ಮತ್ತು ಹೊಂಗಿರಣ ಪೌಂಡೇಶನ್ ಸಹಯೋಗದಲ್ಲಿ ಶಿರಸಿಯ ಲಾಯನ್ಸ ಸಭಾಭವನದಲ್ಲಿ (ದಿ.9-04-2022, 4.00 ಗಂಟೆಗೆ) ನಡೆದ, ಯಕ್ಷಗಾನ ವಿದ್ವಾಂಸ ಪ್ರೋ||ಡಾ||ಜಿ.ಎ. ಹೆಗಡೆ ಸೋಂದಾ ಅವರ ಹತ್ತನೆಯ ಕೃತಿ “ಯಕ್ಷಗಾನಂ ಗೆಲ್ಗೆ” ಕೃತಿಯನ್ನು ಲೋಕಾರ್ಪಣೆಗೊಳಿಸಿ ಮಾತಾಡುತ್ತಿದ್ದರು. ಕಲಾಗೌರವ ಸನ್ಮಾನವನ್ನು ಸ್ವೀಕರಿಸಿದ ಅವರು, ಶಿಕ್ಷಣತಜ್ಞ ಯಕ್ಷಗಾನ ವಿದ್ವಾಂಸರೂ ಆದ ಡಾ|| ಜಿ.ಎ.ಹೆಗಡೆ ಸೋಂದಾ ಇಂತಹ ವ್ಯಕ್ತಿ ಶಿರಸಿಯಂತಹ ಊರಲ್ಲಿ ಇರುವುದೇ ಕಲಾವಿದರಿಗೆ ಹೆಮ್ಮೆಯ ವಿಷಯ ಎಂದರು.
ಮುಖ್ಯ ಅತಿಥಿಗಳಾಗಿ ಆಗಮಿಸಿದ ಖ್ಯಾತ ವಿಮರ್ಶಕ ವಿದ್ವಾನ ಗ.ನಾ ಭಟ್ ಮೈಸೂರು ಮಾತಾಡಿ ಡಾ|| ಜಿ.ಎ. ಹೆಗಡೆ ಸೋಂದಾ ಅವರು ಶಿಕ್ಷಣ, ಸಾಹಿತ್ಯ, ಸಮಾಜಸೇವೆ ಈ ಮೂರು ಆಯಾಮಗಳಲ್ಲಿ ದುಡಿಯುತ್ತಾ ನಾಲ್ಕನೇಯ ಆಯಾಮವಾಗಿ ಯಕ್ಷಗಾನ ಕ್ಷೇತ್ರದಲ್ಲಿ ಹವ್ಯಾಸಿ ವೇಷಧಾರಿಯಾಗಿ, ಉತ್ತಮ ಅರ್ಥದಾರಿಯಾಗಿ, ಯಕ್ಷಗಾನ ವಿದ್ವಾಂಸರಾಗಿ ಬೆಳೆದಿದ್ದು ಸ್ತುತ್ಯಾರ್ಹವಾಗಿದೆ. “ಯಕ್ಷಗಾನಂ ಗೆಲ್ಗೆ” ಗ್ರಂಥದಲ್ಲಿ ಅವರ ವಿಶಾಲವಾದ ಚಿಂತನೆಯ ಹರಹು ಹಸನಾಗಿ ಹರಿದಿದೆ ಎಂದು ತಿಳಿಸುತ್ತಾ, ಇಂದು ಯಕ್ಷಗಾನ ಸಾಗುತ್ತಿರುವ ದಾರಿಯನ್ನು ವಿದ್ವತ್ ಪೂರ್ಣವಾಗಿ ವಿಶ್ಲೇಶಿಸಿದರು.
ಮತ್ತೋರ್ವ ಮುಖ್ಯ ಅತಿಥಿ ಯಕ್ಷರಂಗ ಪತ್ರಿಕೆಯ ಸಂಪಾದಕ ಗೋಪಾಲಕೃಷ್ಣ ಭಾಗವತ ಕಡತೋಕಾ ಮಾತಾಡಿ ಉತ್ತಮ ರೀತಿಯಲ್ಲಿ ಅಚ್ಚುಕಟ್ಟಾಗಿ ಸಂಘಟಿಸಿದ ಕಾರ್ಯಕ್ರಮದ ವೈಖರಿಯನ್ನು ಪ್ರಶಂಶಿಸಿದರು. ಯಕ್ಷಗಾನ ವಿದ್ವಾಂಸ ನಿವೃತ್ತ ಪ್ರಾಚಾರ್ಯ ಕಲಾವಿದ ಡಾ|| ಜಿ.ಎ. ಹೆಗಡೆ ಸೋಂದಾ ಅವರು ವಿವಿಧ ಆಯಾಮಗಳಲ್ಲಿ ಕೊಡುಗೆ ನೀಡಿದ್ದು, ಅದನ್ನು ರಾಜ್ಯದ ಹಾಗೂ ಜಿಲ್ಲೆಯ ಯಕ್ಷಗಾನ ವಲಯ ಧನಾತ್ಮಕವಾಗಿ ಗುರುತಿಸಿ ರಚನಾತ್ಮಕವಾಗಿ ಉಪಯೋಗಿಸಿಕೊಳ್ಳಬೇಕಾಗಿದೆ ಎಂದರು.
ಲ.ಪ್ರಭಾಕರ ಹೆಗಡೆ, ಲ.ಗುರುರಾಜ ಹೊನ್ನಾವರ, ಅತಿಥಿಗಳಾಗಿ ಉಪಸ್ಥಿತರಿದ್ದು ಲ.ಡಾ|| ಜಿ.ಎ. ಹೆಗಡೆ ಅವರನ್ನು ಅಭಿನಂದಿಸಿದರು.
ಹಿರಿಯ ಕವಿ ಜಿ.ವಿ.ಕೊಪ್ಪಲತೋಟ ಧರ್ಮಸ್ಥಳದ ಮಂಜುನಾಥ ಸ್ವಾಮಿಗೆ ಅರ್ಪಿಸಿದ, ಕ.ಸಾ,ಪ ಅಧ್ಯಕ್ಷ ಮಹೇಶ ಜೋಷಿ ಮುನ್ನುಡಿ ಬರೆದ, 26 ವೈಚಾರಿಕ ವಿದ್ವತ್ ಪೂರ್ಣ ಲೇಖನಗಳನ್ನು ಒಳಹೂರಣವಾಗಿ ಹೊಂದಿದ “ಯಕ್ಷಗಾನಂ ಗೆಲ್ಗೆ” ಗ್ರಂಥವನ್ನು ಹಿರಿಯ ಕವಿ ಜಿ.ವಿ.ಕೊಪ್ಪಲತೋಟ ಸೊಗಸಾಗಿ ಪರಿಚಯಿಸಿದರು.
ಲೇಖಕರ ಸ್ವಗತದಲ್ಲಿ ಡಾ|| ಜಿ.ಎ. ಹೆಗಡೆ ಸೋಂದಾ, ಮಹತ್ತಾದ ಮಹಾನ್ ಕಲೆಯ ಶ್ರೇಷ್ಟತೆಗೆ ತಲೆಬಾಗಿ ಬಾಲ್ಯದಿಂದಲೂ ಯಕ್ಷಗಾನದತ್ತ ಒಲವು ಹೊಂದಿ ಉಡುಪಿಯ ಯಕ್ಷಗಾನ ಕಲಾಕೇಂದ್ರದಲ್ಲಿ ಶಾಸ್ತ್ರೀಯವಾಗಿ ಅಧ್ಯಯನ ಮಾಡಿದ ಪರಿಣಾಮ, ಅಳಿಲಸೇವೆಯಾಗಿ ಕಲಾಸೇವೆಗೈಯ್ಯಲು ಕಾರಣವಾಯಿತು ಎಂದು ವಿನಮ್ರರಾಗಿ ನುಡಿದರು.
ಅಧ್ಯಕ್ಷತೆ ವಹಿಸಿದ್ದ ಲಾಯನ್ಸ ಅಧ್ಯಕ್ಷ ಉದಯಸ್ವಾದಿ ಕ್ಲಬ್ಬಿನ 48 ವರ್ಷಗಳ ಇತಿಹಾಸದಲ್ಲಿ ನಮ್ಮ ಕ್ಲಬ್ಬಿನ ಮಾಜಿ ಅಧ್ಯಕ್ಷರೂ, ಯಕ್ಷಗಾನ ವಿದ್ವಾಂಸರೂ ಆದ ಡಾ|| ಜಿ.ಎ ಹೆಗಡೆ ಅವರ ಇಂತಹ ಉತ್ತಮ ಗ್ರಂಥ ಬಿಡುಗಡೆ ಆದದ್ದು ಅತ್ಯಂತ ಹೆಮ್ಮೆಯ ವಿಷಯವಾಗಿದ್ದು ಡಾ|| ಹೆಗಡೆ ಅವರು ನಮ್ಮ ಕ್ಲಬ್ಬಿನ ಹೆಮ್ಮೆ ಎಂದರು.
ಆರಂಭದಲ್ಲಿ ಕಾರ್ಯದರ್ಶಿ ಲ.ವಿನಯ ಹೆಗಡೆ ಸ್ವಾಗತಿಸಿದರು. ಲ.ಅನಿತಾ ಹೆಗಡೆ ಸಂದೇಶ ವಾಚಿಸಿದರೆ, ಲ.ತ್ರಿವಿಕ್ರಮ್ ಪಟವರ್ಧನ್ ಸನ್ಮಾನ ಪತ್ರ ವಾಚಿಸಿದರು.
ಗ್ರಂಥ ಲೋಕಾರ್ಪಣೆಯ ನಂತರ ಯಕ್ಷಗಾನ ಕ್ಷೇತ್ರ ವಿಸ್ತರಣೆ ಕುರಿತು ಸಂವಾದ ಕಾರ್ಯಕ್ರಮ ನಡೆಯಿತು. ಕವಿ ಕೃಷ್ಣ ಪದಕಿ ಕವಯಿತ್ರಿ ಪ್ರತಿಭಾ.ಎಂ.ನಾಯ್ಕ್ ಕಾರ್ಯಕ್ರಮವನ್ನು ಸೊಗಸಾಗಿ ನಿರ್ವಹಿಸಿದರು.
ವರದಿ:- ದತ್ತಗುರು ಕಂಠಿ
ಕಾರ್ಯದರ್ಶಿ ಹೊಂಗಿರಣ ಪೌಂಡೇಶನ್
9483648230
