ಸಾಹಿತ್ಯ ಕ್ಷೇತ್ರವೇ ಇರಲಿ, ಭಾಷಾ ತೊಡಕುಗಳೇ ಇರಲಿ, ವೇದ ಸಂಬಂಧಿ ಜಿಜ್ಞಾಸೆಗಳೇ ಇರಲಿ, ತುಳು, ಕನ್ನಡ, ಸಂಸ್ಕೃತ ಭಾಷೆಯ ಶಬ್ದಕೋಶಗಳ ಬಗ್ಗೆ ಬಂದ ಸಂಶಯ, ಜಿಜ್ಞಾಸೆಗಳೇ ಇರಲಿ, ನಮಗೆ ಮೊದಲು ನೆನಪಾಗುವುದು ಅವರೇ. ಇಂತಹಾ ಯಾವುದೇ ಸಮಸ್ಯೆಗಳಿಗೆ, ಪ್ರಶ್ನೆಗಳಿಗೆ ಕ್ಷಣಾರ್ಧದಲ್ಲಿ ಉತ್ತರ ಡಾ. ಪಾದೆಕಲ್ಲು ವಿಷ್ಣು ಭಟ್ಟರ ಬಳಿ ಇದೆ. ಜಿಜ್ಞಾಸುವಿನ ಪ್ರಶ್ನೆಗಳಿಗೆ ಪಂಡಿತನ ಬಳಿ ಉತ್ತರವಿದೆ. ಅಂತಹ ಪಂಡಿತ ಪರಂಪರೆಯ ವಿದ್ವಾಂಸ ಪಾದೇಕಲ್ಲು ವಿಷ್ಣು ಭಟ್ಟರ ಕುರಿತಾಗಿ ಕನ್ನಡ ಸಂಘ ಕಾಂತವರದವರು ಪ್ರಕಟಿಸಿದ ಹಾಗೂ ಡಾ ಎಸ್. ಆರ್. ಅರುಣ ಕುಮಾರ್ ಬರೆದ ಪುಸ್ತಕವೇ ‘ಪಂಡಿತ ಪರಂಪರೆಯ ಡಾ. ಪಾದೇಕಲ್ಲು ವಿಷ್ಣು ಭಟ್ಟ’.
ಪುಸ್ತಕದಲ್ಲಿ ಪಾದೇಕಲ್ಲು ವಿಷ್ಣು ಭಟ್ಟರ ಬಗ್ಗೆ ಸವಿವರವಾದ ಚಿತ್ರಣ ಇದೆ. ಅವರು ತಮ್ಮ ಕಾಲೇಜು ದಿನಗಳಿಂದಲೂ ಸದಾ ಅಧ್ಯನಯನಶೀಲತೆಯನ್ನು ಮೈಗೂಡಿಸಿಕೊಂಡದ್ದು, ಹೆಚ್ಚಾಗಿ ಬಿಳಿ ಪಂಚೆಯಲ್ಲಿ, ಬಿಳಿಯಂಗಿಯಲ್ಲಿ ಕಾಣಿಸಿಕೊಳ್ಳುವ ವಿಷ್ಣು ಭಟ್ಟರ ಸರಳತನ, ತಮ್ಮ ಮೂಲ ಮನೆ ಪಾದೇಕಲ್ಲಿನಿಂದ ಉಡುಪಿ ಜಿಲ್ಲೆಯ ಆತ್ರಾಡಿಯಲ್ಲಿ ನೆಲೆಸಿದ ಕಥೆ, ಬಾಲ್ಯದಿಂದಲೇ ಕನ್ನಡ, ತುಳು, ಸಂಸ್ಕೃತ ಭಾಷೆಗಳಲ್ಲಿ ಅವರಿಗೆ ಇದ್ದ ಆಸಕ್ತಿ ಮತ್ತು ಪ್ರಭುತ್ವ, ಪುತ್ತೂರಿನ ವಿವೇಕಾನಂದ ಕಾಲೇಜಿನಲ್ಲಿ ಅವರ ಶಿಕ್ಷಣದ ದಿನಗಳು, ಪಿತೃವಾಕ್ಯ ಪರಿಪಾಲಕ ವಿಷ್ಣು ಭಟ್ಟರು, ಬಿಳಿ ಪಂಚೆ ಅಂಗಿಯುಡುಗೆಯಲ್ಲಿ ಎಂ. ಎ. ಪದವಿ ಪ್ರಮಾಣ ಪಾತ್ರ ಸ್ವೀಕರಿಸಿದ ಕುತೂಹಲಕಾರಿ ಸಂದರ್ಭ, ಸರಕಾರೀ ಕಾಲೇಜಿನ ಉದ್ಯೋಗದ ನಂತರ ಆಡಳಿತಾತ್ಮಕ ಪ್ರಾಂಶುಪಾಲ ಹುದ್ದೆಯ ನಿರ್ವಹಣೆ, ಆಮೇಲೆ ‘ಭಾಗವತದ ಯಕ್ಷಗಾನ ಪ್ರಸಂಗಗಳು’ ಎಂಬ ವಿಷಯದಲ್ಲಿ ಸಂಶೋಧನಾ ಪ್ರಬಂಧವನ್ನು ಬರೆದು ಪಿ ಎಚ್ ಡಿ ಪದವಿಯನ್ನು ಪಡೆದದ್ದು ಮೊದಲಾದ ವಿಷ್ಣು ಭಟ್ಟರ ಹತ್ತು ಹಲವು ಹೋರಾಟದ ಸಾಧನೆಯ ಮುಖಗಳನ್ನು ಈ ಪುಸ್ತಕದಲ್ಲಿ ವಿವರಿಸಲಾಗಿದೆ. ಪಾದೆಕಲ್ಲು ವಿಷ್ಣು ಭಟ್ಟರು ಯಕ್ಷಗಾನದ ಬಗ್ಗೆಯೇ ಮಹಾಪ್ರಬಂಧವನ್ನು ಬರೆದು ಡಾಕ್ಟರೇಟ್ ಪದವಿ ಪಡೆದವರು.
ಹೀಗೆ ಪಾದೇಕಲ್ಲು ಅವರ ಸಾಧನೆಯ ಹಾಗೂ ಸದಾ ಸಂಶೋಧನೆಯ ಕಾಯಕವನ್ನು ಈ ಪುಸ್ತಕದಲ್ಲಿ ವಿವರಿಸಲಾಗಿದೆ. ಕಷ್ಟಗಳನ್ನು ಎದುರಿಸಿ ಸಾಧನೆಯನ್ನು ಮಾಡುವವರಿಗೆ ಭಟ್ಟರ ಜೀವನ ಚರಿತೆ ಒಂದು ಉತ್ತಮ ಮಾರ್ಗದಶಿ. ಡಾ. ಪಾದೆಕಲ್ಲು ವಿಷ್ಣು ಭಟ್ಟರು ಬರೆದ ಲೇಖನಗಳು, ಪ್ರಕಟವಾದ ಅವರ ಕೃತಿಗಳು, ಅವರ ಸಂಶೋಧನಾನುಭವ, ಸಂಪಾದಿತ ಕೃತಿಗಳು, ಸಹಸಂಪಾದಿತ ಕೃತಿಗಳು, ಅನುವಾದಿತ ಕೃತಿಗಳು, ಗೌರವ, ಪ್ರಶಸ್ತಿ, ಸನ್ಮಾನಗಳ ಬಗ್ಗೆ ವಿವರವಾದ ಮಾಹಿತಿಗಳು ಈ ಪುಸ್ತಕದಲ್ಲಿವೆ. ಯಕ್ಷಗಾನಕ್ಕೂ ವಿಷ್ಣು ಭಟ್ಟರಿಗೂ ಅವಿನಾಭಾವ ಸಂಬಂಧ. ಆ ಬಗ್ಗೆ ಪುಸ್ತಕದಲ್ಲಿ ಸವಿವರ ಕೊಡಲಾಗಿದ್ದು ಸಾಹಿತ್ಯ ಪ್ರಿಯರೆಲ್ಲರೂ ಓದಲೇ ಬೇಕಾದ ಪುಸ್ತಕ ಹಾಗೂ ಕನ್ನಡ ಸಾರಸ್ವತ ಲೋಕಕ್ಕೆ ಇದೊಂದು ಉತ್ತಮ ಕೊಡುಗೆ.
